dem: 01.04.2017 14:29 xwendin: 381

Li bakurê Kurdistanê gelek nivîskar hene ku bi tirkî û bi kurdî (kurmancî, zazakî) dinivîsin. Gelek car bi îbareya "Ben bir Kürt aydını olarak…/ Ez wekî roşinbîrekî kurd…" dest bi axaftin yan jî nivîsînê dikin.

Ez li vir tarîfa "roşinbîrî/entelektuelîyê" nakim, kesê ku bixwaze dikare bikeve dû bê hela "roşinbîrî/entelektuelî" çi ye. Û helbet ji ber ku "kurd" navê miletekî ye, hingê têgeha "bir Kürt aydını/rewşenbîrekî kurd" jî çi ye, dikarin wê jî zelal bikin.

Heta niha gelek caran min dîtiye beşeka mezin ji van "nivîskar/roşinbîrên kurd" yên Bakur, bi taybetî li Dîyarbekirê, ji bo piştgirîya partîyekê, ji bo serok yan endamên wê, hatine cem hev, daxuyanî îmza kirine û bo raya giştî belav kirine, yan jî di vê îstîqametê de nivîs û meqale nivîsîne...

Dîsa, gelekê caran li dijî partî û şexsîyetên kurd yên başûrê Kurdistanê, wekî mînak, li dijî pêşmergeyan, bi taybetî li dijî serokê Rêvebiriya Başûrê Kurdistanê Mesûd Barzanî daxuyanî dane, peyam ragihandine, rexneyên gelek tund li wan girtine, ew bi xayîntiye tawanbar kirine, dijûnê wan dane, ji wan re kufir kirine. Li ser tora înternetê; di malperên ajansan de bi dehan, bi sedan nimûneyên vê hene.

Li alîyê din, li bakurê Kurdistanê, li Dîyarbekirê, bi taybetî vê sala dawîyê li rojavayê Kurdistanê her awa tehqîr li "Alaya Rengîn" bûye û dibe; Alaya Kurdan dihê şewitandin, dihê redkirin… Lê ji tu "bir Kürt aydını/rewşenbîrekî kurd" deng derneketiye.

Li başûrê Kurdistanê, ji salên 1990î vir de kurdên me yên wir gav bi gav ji bin nîrê rejîma erebên zulimkar derketin. Kor-topal, paqij-qirêj, rast-xwar, axir her çawa be, êdî li wir kurd bi xwe xwe bi rê ve dibin. Bi munasebeta êrîşên DAIŞê erd û bajarên kurdan, mesela wekî Kerkûkê ku di bin îdareya ereban de mabû, ew jî ketin destê kurdan. Niha 35 dewletên mezin yên dinyayê li Hewlêrê konsolxane vekirine, di hefteyekê de çend serok û payebilindên dewletên mezin yên dinyayê tên Hewlêrê û diçin. Xulasa kurd li wir hatine wê dereceyê ku dikarin êdî dewleta serbixwe ya kurdan îlan bikin. Înşalah dê bikin.

Ji ber şertên şerê navxweyî yê li Sûrîyê û derketina meydanê ya DAIŞê, li rojavayê Kurdistanê jî proseseka wisa pêş ve diçe. Eger ne ji fikrê "kofederalîzma demokratîk (!)" be, îhtîmaleka mezin, li rojavayê Kurdistanê jî kurd dê ji bin nîrê ereban derkevin û ew bi xwe xwe bi rê ve bibin. Belkî li wir jî dewleteka kurdan îlan bibe. Înşalah dê wisa be.

Lê partîyek û karbidestên wê, her roj daxuyanîyan didin û "dewletbûna kurdan" red dikin, li dijî "dewletbûna kurdan" dixebitin. Bêyî ku ji miletê kurd bipirsin, wekî partî dibêjin "Me fikrê dewletbûnê avêtiye çopê!"

Çawa ku li hemberî êrîşên bi ser Alaya Kurdan tu dengek ji nivîskar/roşinbîrên daxuyanîhez (!) yên Bakurî derneket, li hember vê xebata li dijî dewletbûna kurdan, li dijî kurdayetîyê jî dernayê. Gelo ev çawa "bir Kürt aydını/rewşenbîrekî kurd"bûn e?!

Ez bi xwe terefdar/layengîrê tu partîyeka kurdan nînim, ez miletê xwe esas digrim, baş yan xirab ez tu ferdekî kurd jî red nakim. Eger xirab bin xirabên me ne. Eger baş bin jixwe baş in. Lê ez nabêjim bila nivîskarên bakurê Kurdistanê ku xwe "roşinbîr" dizanin nebin terefdar/layengîr yan jî mîlîtanên partîyekê/îdeolojîyekê yan jî xwe wekî muxalifê (opozîsyon) partîyeka din a kurdan nebînin. Li gorî fikra demokratîka rastîn, her kes muxeyer e, serbest e, azad e.

Lêbelê dema ku xeletîyên partî yan jî karbidestên partîya wan yên li dijî kurdayetî û Alaya Rengîn û mafê dewletbûna kurdan çêdibin, bila wê demê jî daxuyanî bidin, bila rexne li partî û karbidestên partîya xwe jî bigrin ku meriv bawer bike ew bi rastî jî "bir Kürt aydını/rewşenbîrekî kurd" in.

Gelo partîya wan û karbidestên partîya wan hîç xeletîyek yan neheqîyek yan îhlalkirina mafên însanî û mafên kurdbûnê nakin? Ev nivîskar/roşinbîrên Bakur dikarin bi dilekî rehet bibêjin hemî kirin û gotin û polîtîkaya partî û karbidestên partîya me rast in?

Ez dibêjim, eger nivîskarên Bakurî ku xwe kurd dibînin û dibêjin "Ben bir Kürt aydını olarak…/ Ez wekî rewşenbîrekî kurd…" hingê divê ji bo berjewendîyên neteweyî yên miletê kurd tevbigerin ne ku tenê li gorî polîtîka û îdeolojîya partîya xwe. Çimkî hemî partîyên ku li Kurdistanê fealîyet dikin divê xizmeta miletê kurd bikin, divê guhdarîya miletê kurd bikin, ne ku kurdan wekî kerîyê pez wir de bibin, vir de bînin, hişê wan tevlihev bikin û bikin xizmeta xwe.

Madem wisa ye, ew nivîskar û roşinbîrên Bakurî bila ji vir û pê ve tenê bibêjin "Ben bir filanca partinin aydını/yazarı olarak…/ Ez wekî roşinbîrekî/nivîskarekî filan partîyê…" ku qet nebe di vî warî de bila xwe rast nîşan bidin!

Roşan Lezgin 

(Ji medyaya civakî hatiye hildan)

Nivîsên Dawî

Metoda Nû ya Tespîtkirina Nexweşiya Kula Heftpençeyê
Zanistî

Metoda Nû ya Tespîtkirina N..

18.11.2017 16:57    Metîn Eser

Lêkolînerê kula heftpençeyê yê pirr bi nav û deng Bob Pinedo derbarê xebatên xwe yên li ser nexweşiya kula heftpençeyê agahiyeke girîng ragihandiye. Bob Pinedo wiha dibêje; “Di çend salên li pêşiya me de dê testek..

Bixwîne
      45
Xebatên Li Ser Atlasa Mirovokî(Robot)
Zanistî

Xebatên Li Ser Atlasa Mirov..

18.11.2017 13:36    Metîn Eser

Robota dişibe mirov, roboteke ewqas baş û jêhatiye ku meriv jê ditirse. Robota mirovokî êdî dikare teqleyên paşpêkî jî biavêje. Xebatkarên Boston Dynamicsê ku berê beşek ji robotên Googleyê bû, xebatên xwe berdewam diki..

Bixwîne
      38
Bandora Xwedîkirina Kûçikê ya Li Ser Tenduristiya Mirov
Zanistî

Bandora Xwedîkirina Kûçikê ..

17.11.2017 23:08    Metîn Eser

Lêkolînên berê yên li ser kûtî/kûçikan diyar kiribû ku tenduristiya kesên di mala xwe de kûçik xwedî dikin, ji tenduristiya kesên kûçik xwedî nakin, baştir bûye, bi taybetî kesên bi tenê ser&ecir..

Bixwîne
      84